Выстава “МоЯ КУ-КУКОЛКА”

У філіяле Веткаўскага музея прэзентавана выстава “МоЯ КУ-КУКОЛКА”. На ёй магчыма ўбачыць старажытную абрадавую ляльку, якая ў свой час служыла правобразам чалавека, а ў многіх выпадках замяняла яго. Успаміны пра такіх лялек захавалiся ў расповедах ці рытуальных дзеяннях жыхароў Веткаўшчыны. Праз экспедыцыйную дзейнасць супрацоўнікамі музея была высветлена сімволіка і абрадавая прыналежнасць травяной лялек - з вёскi Пералёўка, лялькі з анучак, што калісь рыхтавалі да абраду “Пахавання стралы”, — з Барталамееўкi і Фёдараўкi, тэкстыльнай — з Пералёўкi.

Працягваюць выставу лялькі з народнага батлеечнага тэатра: Цар Ірад, Ірадзіяда, Марыя з немаўляці, Антон з казой і Антоніха, Ваяка і іншыя вобразы, якія ў свой час нарадзіў народны тэатр.

Не абыходзіць выстава і лялькі прафесійнага лялечнага тэатра, якія прадстаўляюць вобразы, што жылі на сцэне Гомельскага абласнога тэатра лялек.

Своеасаблівай з’явай нашага часу становіцца аўтарская інтэр’ерная лялька, якая, відаць, перажывае своеасаблівы рэнесанс у сваім развіцці. Хто толькі зараз не спрабуе свае сілы ў гэтым цудоўным накірунку мастацтва! На гэтай жа выставе прадстаўлены аўтарскія лялькі мастачкі з Гомеля Наталлі Палунінай-Барысевіч, якая “нараджае” сваіх лялек менавіта пры дапамозе класічных тэхналогій, карыстаючыся тэхнікай пап’е-машэ, як гэта рабілася сотні і сотні гадоў таму.