Абласное аддзяленне Саюза пісьменнікаў Беларусі аб’явіла аб правядзенні рэспубліканскага літаратурнага конкурсу «І. П. Шамякін. «Сэрца на далоні»

Як адзначыў ініцыятар конкурсу, заслужаны дзеяч культуры Беларусі, старшыня абласнога аддзялення Саюза пісьменнікаў Беларусі Уладзімір Гаўрыловіч, літаратурнае спаборніцтва праводзіцца з мэтай выяўлення і падтрымкі таленавітых аўтараў, якія ствараюць творы ў паэзіі, прозе і публіцыстыцы, у тым ліку для дзяцей і юнацтва. Рэспубліканскі конкурс праводзіцца з 15 студзеня па 15 ліпеня, а яго вынікі журы аб’явіць у верасні ў Добрушы на свяце беларускага пісьменства.

Заснавана тры намінацыі. У намінацыях «Проза» і «Паэзія» аўтары могуць даслаць на конкурс (246028 г. Гомель, вул. Савецкая, дом 126, офіс 400-401, Гомельскае абласное аддзяленне СПБ, з паметкай: «Літконкурс «І. П. Шамякін. «Сэрца на далоні») выдадзеныя з 1 ліпеня 2021-га па 1 ліпеня 2022 года друкарскім спосабам кнігі мастацкай прозы, публіцыстыкі, нарысаў, вершаваных твораў. Ёсць і яшчэ адна намінацыя «Проза» – можна даслаць разам з заяўкай вольнай формы на электронную пошту konkursgomelspb2018@yandex.ru кароткае апавяданне на любую тэму на беларускай ці рускай мове, памерам не больш 5 тысяч знакаў з прабеламі.

У кожнай намінацыі ўстанаўліваецца адзін пераможца і два фіналісты, якія занялі ці падзялілі другое-трэцяе месца. Пераможца будзе ўзнагароджаны дыпломам лаўрэата і падарункам, фіналісты – спецыяльным дыпломам. Кнігі, дасланыя на конкурс, знойдуць шырокага чытача: будуць перададзены для папаўнення фондаў бібліятэк Гомельшчыны.