Віншаванне з днём нараджэння галоўнаму міратворцу Гомельшчыны

#RIGHT_ITEM_1#Гомельскае абласное аддзяленне Беларускага фонду міру не словам, а справамі даказвае, што толькі дыпламатыя здольна адрадзіць мір, згоду і сяброўства паміж людзьмі, народамі і краінамі. Больш за чвэрць стагоддзя рэгіянальнае аддзяленне БФМ узначальвае Цімафей Іванавіч Глушакоў, чалавек, які ведае, што такое вайна, на сабе адчуў яе здзекі і пакуты. Тройчы ледзь не загінуў, па ім стралялі. Бацькаву хату ў роднай вёсцы Янкаўшчына, што на Віцебшчыне, карнікі спалілі. Таму Дзень Перамогі лічыць галоўным святам у жыцці. Захаванне гістарычнай памяці, паказ праўды пра вайну, давядзенне яе да моладзі – справа гонару для Цімафея Глушакова.

Цімафей Іванавіч з’яўляецца хросным бацькам юных міратворцаў Гомельшчыны. Акцыя «Дарогамі спаленых вёсак» – яго непасрэдная заслуга. Гэта дзеянне накіравана на недапушчэнне аднаўлення генацыду.

Кожны дзень, адведзены яму лёсам, галоўны міратворац вобласці імкнецца зрабіць нешта добрае на карысць людзям, каб дзень не прапаў дарэмна. Ён лічыць, што галоўнае ў чалавеку – гуманнасць, міласэрнасць, дабрачыннасць і любоў да жыцця.

Сціпласць – важная рыса характару Цімафея Глушакова, ён не любіць усхвалення ў свой бок. Шмат гадоў ён працаваў на Брагіншчыне, а гэта мая малая радзіма. Цімафей Іванавіч мой сябра і старэйшы таварыш у барацьбе за мір, справядлі­васць і ўзаемаразуменне паміж людзьмі, народамі і краінамі. Сімвалічна, што свой 90-гадовы юбілей ён сустракае на праваслаўнае свята Стрэчання ў год 80-годдзя вызвалення Беларусі ад гітлераўскіх акупантаў.