Гамяльчанка Святлана Тусава — мар­жыха з дзевяцігадовым стажам

Гамяльчанка Святлана Тусава — мар­жыха з дзевяцігадовым стажам, з’яўляецца членам Беларускай федэрацыі закальвання і спартыўнага зімовага плавання.

У кастрычніку пры тэмпературы плюс восем Святлана Станіславаўна плыла марафон на Камсамольскім возеры ў Мінску. А нядаўна прыехала з дыпломам за першае месца ў трэцім этапе “Белгарт Кубку” з адкрытага рэспубліканскага фестывалю здаровага ладу жыцця “Хрышчэнскія купанні”, перамагла на дыстанцыі 200 метраў брасам з вынікам 6.45.98. Наша зямлячка спаборнічала ў Мінску з прадстаўніцамі Расіі, Аргенціны, Эстоніі, Польшчы.

Святлана Станіславаўна — маці траіх дарослых дзяцей, ужо амаль тры гады наведвае гомельскі клуб аматараў плавання і гаворыць, што любімая вада, дзе адводзіць душу, вядома ж, Сож.

— У дзяцінстве я шмат часу правяла ў Рудні-Целяшоўскай Гомельскага раёна, там загартавалася, як і ўся тагачасная малеча, — дзеліцца жанчына. — А зараз імкнуся далучыць да любімага віду і ўнучачку Віку. Ёй пакуль толькі годзік і восем месяцаў: любіць боўтацца ў ванне, а ўлетку плаваем з ёю ў возеры. Калі падрасце, спадзяюся, будзем і маржаваць разам.

Святлана Тусава працуе ў гомельскай дзіцячай школе мастацтваў № 5 касцюмерам. Яе ведаюць тут як руплівіцу, стараннямі якой адзенне і іншыя атрыбуты конкурсных і канцэртных выступленняў заўжды падрыхтаваны як след, радуюць гледачоў. Вось такая цікавая жанчына жыве побач з намі. Пажадаем ёй новых поспехаў на ўсіх жыццёвых нівах!