Пагашчане пакарагодзілі

Абрад Юраўскага, альбо Тураўскага, карагода справілі ў вёсцы Пагост на дзень святога Юр’я. Як дзесяцігоддзі і нават стагоддзі таму, у Пагосце пяклі хлеб-карагод, урачыста ўпрыгожвалі яго пад абрадавыя спевы, ішлі з ім, а таксама з зоркай, абразом, граблямі, на якіх начэплены фартух, на жытнёвае поле. Там вадзілі карагоды, а потым вярталіся ў вёску, каб абысці з абрадавымі песнямі двары аднавяскоўцаў і пажадаць усім ураджайнага года, бо “дзе карагод ходзіць — там жыта родзіць”. Гаспадары дарылі за гэта яйкі, а больш шчодрыя і заможныя — яшчэ і пляшку. Абышоўшы вёску, гулялі ў “Проса”, “Дрэму”, “Бабусю”. Знамянальнай падзеяй для вяскоўцаў стала арганізацыя ў мясцовым клубе свята-фестывалю “Тураўскі карагод”, на які з’ехаліся госці з суседніх раёнаў — Лельчыцкага і Петрыкаўскага, а таксама Любанскага Мінскай вобласці. Песенныя традыцыі сваіх мясцін прадстаўлялі заслужаны аматарскі калектыў Рэспублікі Беларусь “Журавінка” Слабадскога сельскага Дома культуры і народны фальклорны калектыў “Палескія напевы” Нова-Палескага сельскага клуба (Лельчыцкі раён), народны фальклорны ансамбль “Спадчына” Курыціцкага сельскага Дома культуры (Петрыкаўскі раён) і фальклорны калектыў “Журавушка” вёскі Ямінск Любанскага раёна. Канешне, не абышлося без яркага выступлення гаспадароў свята — народнага фальклорнага калектыву “Міжрэчча” Пагосцкага сельскага клуба.