Вячоркі на прызбе

Народны фальклорны калектыў “Стаўбунскія вячоркі” прыняў удзел у сёмым рэспубліканскім этнаграфічным канцэрце “Фальклор беларускай глыбінкі” ў Мінску. Канцэрт адбыўся падчас правядзення міжнароднай навуковай канферэнцыі па праблемах захавання аўтэнтычнага фальклору. Стаўбунскія спявачкі выканалі абрадавыя і пазаабрадавыя творы сваёй вёскі, некаторыя з іх калісьці былі выпушчаны на грампласцінцы фірмай “Мелодыя” і добра вядомыя спецыялістам і аматарам. У канцэрце таксама прыняла ўдзел спявачка з вёскі Неглюбка Еўдакія Барсукова. Яна выканала прыпеўкі да традыцыйных побытавых танцаў у суправаджэнні мінскага гарманіста Міхаіла Слізкага.