У Добрушскім раёне ідзе рэканструкцыя ферм

Узімку жывёле аддзялення малочна-таварнай фермы “Лупаўка” СПК “Баршчоўскі” Добрушскага раёна будзе камфортна. Цалкам завершаны работы па рэканструкцыі хлява з элементамі мадэрнізацыі, адзначае кіраўнік гаспадаркі Алег Архіпенка. Тут заменены вокны і кармавыя сталы, уцеплены і пафарбаваны вароты. У абноўленым хляве плануецца ўтрымліваць да 180 галоў дойнага статка. Да фермы прыбудавалі новую даільную залу, абсталяваную сучаснымі даільнымі апаратамі, стойлавым абсталяваннем, ахаладжальнымі ўстаноўкамі закрытага тыпу і ўсім неабходным, што дазволіць атрымліваць малако гатунку “экстра”. У адпаведнасці з сучаснымі тэхналогіямі ў мінулым годзе рэканструявалі ферму “Ніўкі”. Сёлета прывялі ў парадак ферму “Цэнтр”, дзе фасады будынкаў абшылі металапластыкавымі панэлямі. Галоўнае ў рэканструкцыі і мадэрнізацыі фермаў – павелічэнне аб’ёмаў вытворчасці малака, а таксама паляпшэнне яго якасці, упэўнены Алег Архіпенка. Адсюль – павышэнне прыбытку і рэнтабельнасці ў гаспадарцы.