Адкрытае першынства Рэчыцкага раёна па экстрым-бегу прайшло на рацэ Ведрыч у некалькіх кіламетрах ад райцэнтра

Падобныя спаборніцтвы ў раёне праводзяцца ўжо ў другі раз. Калі ў мінулым годзе ў турніры ўдзельнічалі толькі рэчычане, то сёлета экстрым-бег прыцягнуў гасцей і з абласнога цэнтра. Больш за 20 чалавек ва ўзросце ад 15 да 60 гадоў выйшлі на трасу працягласцю ў 5 кіламетраў. Ім давялося бегчы па рэчышчы імклівага Ведрыча насуперак плыні, ды яшчэ пераскокваючы шматлікія ствалы дрэў, што ўпалі ў раку. Потым іх чакала сапраўдная дрыгва, пацягнутая прыгожай зялёнай раскай, круты пад’ём угару і пераадоленне яру, па-над якім навісала вялізнае сасновае карэнне. Змаганне, як і чакалася, было даволі ўпартае. У выніку абсалютным лідарам забегу зрабіўся Андрэй Сінькевіч з Рэчыцы (ён жа пераможца ва ўзроставай групе 35 — 39 гадоў). У самай юнай узроставай групе (15 — 20 гадоў) перамог Андрэй Ігнатовіч, а ў самай старэйшай (55 — 60 гадоў) — Уладзімір Раманюк. Прадстаўнік Гомеля Валянцін Ткачоў прыйшоў да фінішу першым ва ўзроставай групе 40 — 44 гады, а яго жонка Жана Ткачова — адзіная ўдзельніца-жанчына, таму і стала пераможцай.