Месяцовае святло музыкі

Песню для прадстаўніка Беларусі на дзіцячым “Еўрабачанні” дапамог напісаць Бетховен.
Наша краіна вызначылася са сваім прадстаўніком на конкурсе гэтага года. Ім стаў 13-гадовы Данііл Казлоў з Жабінкі. Па выніках галасавання журы і гледачоў ён набраў найвялікшую колькасць балаў — 24. Другое месца ў беларускім адборачным туры заняла Эвеліна Лашук з Мінска з “Дзядуліным хітом”, а трэцяе — мазыранка Юлія Атрошчанка з песняй “Купала”.
Што датычыцца пераможнай песні “Музыкі святло”, то яна прысвечана “Месяцовай санаце” Людвіга ван Бетховена. Акорды класічнага твора нават выкарыстоўваюцца ва ўступе кампазіцыі. Гэта, дарэчы, забаронена правіламі “Еўрабачання”, таму песня павінна быць перапрацавана да фіналу конкурсу, які нагадаем, адбудзецца ў гэтым годзе ў Мінску 20 лістапада.