Дзякуй вам, беларусы!

У Клімаўскі раён, што на Браншчыне, на дапамогу мясцовым сейбітам са сваёй тэхнікай прыбыў лепшы механізатар КСУП “Харошаўскае” Добрушскага раёна Аляксандр Крывой. Там ён будзе працаваць да пачатку кастрычніка.
— Паміж нашымі раёнамі падпісаны дагавор аб дружбе і супрацоўніцтве, — расказвае старшыня Добрушскага райвыканкама Вольга Мохарава. — Таму па першай жа просьбе з Клімаўшчыны пайшлі суседзям насустрач.
Беларускі сейбіт на трактары МТЗ-1523 з камбінаваным пасяўным агрэгатам французскай вытворчасці будзе працаваць на палетках сельгаспрадпрыемстваў “Гетманава Буда” і “Харомнае”. У кожнай з гаспадарак патрэбна пасеяць азімыя на 150 гектарах. У клімаўскіх хлебаробаў склалася крытычная сітуацыя: старэнькія сеялкі СЗУ-3,6, якія выпушчаны амаль 30 гадоў таму, не ў стане выканаць такі аб’ём работ. Гаспадаркі не могуць набыць новую пасяўную тэхніку з-за вельмі складанага фінансавага становішча. Не разлічваюць клімаўскія хлебаробы і на дапамогу дзяржавы.
— Напярэдадні пабываў на клімаўскай зямлі. Глеба там падрыхтавана поўнасцю, — дзеліцца ўражаннямі дырэктар КСУП “Харошаўскае” Рыгор Фёдараў. — Патрэбна было бачыць шчаслівыя твары кіраўнікоў мясцовых сельгаскааператываў, яны хадзілі вакол нашага трактара, камбінаванага пасяўнога агрэгата, нават не ведалі, з якога боку падысці да такой тэхнікі! “Малайцы вы, беларусы! — казалі яны. — Мы бачым, як у вашай дзяржаве клапоцяцца, падтрымліваюць аграрыяў. Нам бы такія клопаты...”
— Вялікі дзякуй беларускім сябрам! — сказаў кіраўнік Клімаўскай раённай адміністрацыі Сяргей Кубараў. — Сёння вы дапамаглі нам, заўтра мы дапаможам вам!