Зорка Валянціны Кадзетавай

Дыпломам другой ступені рэспубліканскага конкурсу на лепшы твор у галіне прозы адзначана за кнігу “Шкляная зорка” наша зямлячка, ураджэнка вёскі Мікалаеўка Добрушскага раёна, пісьменніца Валянціна Кадзетава. Узнагароду яна атрымала на 16-м свяце беларускага пісьменства ў г. Смаргоні Гродзенскай вобласці з рук старшыні журы конкурсу, намесніка міністра інфармацыі Рэспублікі Беларусь Ігара Лапцёнка.
Валянціна Мікалаеўна працуе настаўніцай беларускай і рускай мовы і літаратуры ў Лукскай сярэдняй школе Жлобінскага раёна. А свае творы піша на роднай мове. Яна аўтар яшчэ дзвюх кніг прозы, якія выйшлі раней: “Ад кахання не паміраюць” і “Ля трох пуцявін”. Неаднаразова друкавалася ў “Гомельскай праўдзе”, іншых выданнях, калектыўных зборніках.
Жадаем пісьменніцы-зямлячцы новых яркіх твораў пра чалавечае ў чалавеку!