Зорны час палескіх хлебаробаў

Хлеб на стале — радасць у хаце. Так гаварылі нашы продкі, і гэта ісціна не састарэла сёння. Хлеб ніколі не даецца лёгка, таму для працаўнікоў вёскі дажынкі — сапраўды зорны час. У мінулую суботу раённыя дажынкі святкавалі хлебаробы Мазыршчыны.
Герояў жніва, гасцей з усяго раёна сустракалі ў вёсцы Козенкі — цэнтры СВК “Радзіма”. Шчодрая восень дэманстравала свае дары і плён шчырых хлебаробскіх рук у багатых гандлёвых радах. Побач — творы дэкаратыўна-прыкладнога мастацтва, кампазіцыі з кветак, падрыхтаваныя выхаванцамі дзіцячых студый і кружкоў спецыяльна да свята. У цэнтры ўвагі — выстаўка караваяў, кожны з якіх — сапраўдны шэдэўр і сімвал галоўнага свята працаўнікоў зямлі.
Галоўны ж момант яго — ушанаванне пераможцаў раённага спаборніцтва на ўборцы ўраджаю. Герояў хлебнай нівы і гасцей шчыра вітаў старшыня Мазырскага райвыканкама А. В. Ліс. Сёлетні ўклад раёна ў засекі краіны як ніколі важкі. Валавы збор зерневых і зернебабовых ужо дасягнуў 32,6 тоны, у 1,3 раза вышэйшы за мінулагодні. Рэкордны і ўраджай — 35,1 цэнтнера з гектара. Лепшыя паказчыкі ў саўгасе-камбінаце “Зара”, які таксама лідэр рэспубліканскага спаборніцтва. Важкія намалоты ў КСУП “Мазырская агароднінная фабрыка”, Слабадскім СВК імя Леніна, гаспадароў свята — ВСК “Радзіма”, РСУП “Эксбаза “Крынічная”. Кіраўнікі іх прымалі ўзнагароды і віншаванні, падарункі ад партнёраў-прамыслоўцаў. Адзін за другім на сцэну падымаліся камбайнеры-тысячнікі, вадзіцелі — тыя, ад каго і залежыў лёс такога нялёгкага сёлетняга ўраджаю. Музычныя падарункі героям жніва і гасцям падрыхтавалі лепшыя самадзейныя калектывы Мазыршчыны і госці — ансамбль народнай песні “Бяседа”.
Суседзі мазыран — калінкавічане — у гэты дзень таксама святкавалі дажынкі і адначасова 449 год нараджэння свайго райцэнтра. Свята раскінулася на галоўнай плошчы Калінкавічаў і ў гарадскім парку. Яно пачалося з адкрыцця па вуліцы Куйбышава адноўленага помніка загінуўшым пры вызваленні раёна ад фашыстаў воінам і партызанам.
У раёне таксама небывалы да гэтага часу ўраджай — 33,4 цэнтнера з гектра. Валавы намалот з улікам зерня кукурузы складзе каля 88 тысяч тон. Найвышэйшы ўраджай зерневых — 55,1 цэнтнера атрымалі ў калгасе “СВК “50 год БССР”. У ліку лідэраў — КСУП імя Кутузава і “Каплічы”, філіял ААТ “Калінкавічыхлебапрадукт”, комплекс па перапрацоўцы свініны “Даманавічы”. 28 камбайнавых экіпажаў і 15 вадзіцеляў на сёлетнім жніве ўзялі тысячны рубеж. Ім у першую чаргу — віншаванні ад старшыні райсельгасхарчу Калінкавіцкага райвыканкама І. І. Піліпца, прэміі і падарункі. Артысты раённай самадзейнасці, сталічны гурт “Тяни-толкай” стваралі святочны настрой гасцям і ўдзельнікам дажынак.
Л. ЛОБАН
Фота аўтара