Мадэляванне бізнесу па-беларуску

Студэнты Гомельскага дзяржаўнага ўніверсітэта імя Францыска Скарыны сталі пераможцамі міжнароднага конкурсу «Мадэляванне бізнес-працэсаў і прыняцце кіраўнічых рашэнняў». Інтэлектуальныя спаборніцтвы прайшлі на базе Хмяльніцкага ўніверсітэта кіравання і права ва Украіне, удзел у іх прымалі каманды Беларусі, Украіны і Расіі. Прычым, ад нашай краіны выступіла адна каманда і яе прадстаўнікам удалося заняць першае прызавое месца. Пераможцы фінальнага этапу конкурсу Максім Пернікаў, Дзяніс Сівалобаў і Цімафей Пігуноў — студэнты 4 курса эканамічнага факультэта. Пасля заканчэння вуза маладыя людзі атрымаюць спецыяльнасць «эканоміка і кіраванне на прадпрыемстве». Навуковы кіраўнік праекта Аліна Арлова расказала, што студэнты на працягу амаль двух гадоў займаюцца навукова-даследчай работай у студэнцкай лабараторыі «Сучасны менеджмент і інавацыі», якая дзейнічае на кафедры ўніверсітэта. Галоўная мэта дзейнасці лабараторыі — навучанне студэнтаў асновам навукова-даследчай і іншай творчай работы, а таксама выпрацоўка практычных уменняў і навыкаў яе правядзення. У дадатак да гэтага маладыя людзі расказалі аб універсітэце Скарыны, сістэме адзнак у ВНУ, студэнцкім самакіраванні. Увазе прысутных быў прадэманастраваны відэаролік аб студэнцкім жыцці ў вышэйшай навучальнай установе. Кубак пераможцаў і сертыфікаты ўдзельнікаў для Максіма, Дзяніса і Цімафея сталі не проста высокай адзнакай іх здольнасцей, але і магчымасцю пашырыць свой кругагляд, пазнаёміцца з новымі цікавымі людзьмі і абмяняцца вопытам з равеснікамі. — Міжнародны конкурс прайшоў на высокім узроўні, — падзяліўся адзін з удзельнікаў праекта Максім Пернікаў. — Мы атрымалі магчымасць пагутарыць са сваімі равеснікамі — студэнтамі 4 курса Хмяльніцкага ўніверсітэта кіравання і права. Яны падзяліліся сваімі творчымі задумкамі ў падрыхтоўцы сацыяльных праектаў, якія ўвасабляюць у жыццё ў бізнес-цэнтры ВНУ. Для Дзяніса Сівалобава ўдзел у міжнародных інтэлектуальных спаборніцтвах стаў своеасаблівай кропкай адліку ў рэалізацыі творчых здольнасцей. Студэнт атрымаў шмат пазітыўных эмоцый. Усведамленне адчування ўвагі на сабе, значымасці праекта, над якім ён працаваў разам з рабятамі — самае каштоўнае, прызнаўся малады чалавек. Пра паездку ва Украіну і ўдзел у спаборніцтвах такога ўзроўню Цімафей Пігуноў марыў даўно. Вельмі ўразіла маладога чалавека гасціннасць гаспадароў брацкай краіны. Для ўдзельнікаў конкурсу арганізавалі аглядную экскурсію па горадзе з наведваннем славутых месцаў. А яшчэ Цімафею запомніўся ўніверсітэцкі музей. Канкурсант даведаўся аб тым, што ВНУ споўніўся 21 год і штогод веды ў ёй набываюць 2000 студэнтаў.