Шатландскія сябры на Гомельшчыне

Дэлегацыя прадстаўнікоў горада-пабраціма Абердзіна, што ў Шатландыі, наведала Гомельскі дзяржаўны прафесійны ліцэй будаўнікоў. Выкладчыкі і студэнты навуковага цэнтра «Tullos Training Ltd» прыбылі ў Гомель, каб абмяняцца вопытам са сваімі калегамі. У ходзе сустрэчы яе ўдзельнікі пазнаёміліся з вучэбнай і вытворчай базай ліцэя, наведалі заняткі вытворчага навучання, пабылі ў Гомельскім цэнтры павышэння кваліфікацыі кіраўнікоў і спецыялістаў, на гомельскім заводзе сантэхнарыхтовак. Членаў дэлегацыі запрасілі ў Гомельскі дзяржаўны каледж народных мастацкіх промыслаў і Гомельскі дзяржаўны тэхнічны ўніверсітэт імя П. Сухога. Для гасцей горада былі арганізаваны экскурсіі па Палацава-паркавым ансамблі Румянцавых-Паскевічаў, прадстаўнікі дэлегацыі наведалі гарадскія музеі і выставы. Візіт дэлегацыі Гомельскага ліцэя будаўнікоў у шатландскі навуковы цэнтр запланаваны на будучыню.