Кіеў яднае славян

Гэтымі днямі ў Кіеве праходзіла міжнародная славістычная алімпіяда. Школьнікі з Беларусі, Расіі, Украіны і Польшчы ў чацвёрты раз паказвалі свае веды па славянскіх мовах, літаратуры, гісторыі. Спаборніцтва арганізаваў Кіеўскі славістычны ўніверсітэт. Сімвалічна, што менавіта тут, дзе калісьці быў цэнтр Кіеўскай Русі, зноў яднаюцца славянскія мовы, замацоўваюцца сяброўскія сувязі. Асабліва каштоўна гэта для моладзі. Гомельшчына была з годнасцю прадстаўлена вучнямі дзяржаўнага абласнога ліцэя. Дыпломы першай ступені атрымалі Марыя Маліноўская (па журналістыцы, рускай мове і літаратуры), Марыя Селязнёва (па рускай мове), Таццяна Маскалюк (па беларускай мове). Дыпломамі другой ступені адзначаны Антон Пінчук (беларуская мова) і Ігар Чыжык (сусветная гісторыя). Разам з ліцэістамі перамогам радаваўся кіраўнік гомельскай каманды настаўнік беларускай мовы і літаратуры Леанід Сляпцоў. Юнакі і дзяўчаты не толькі прынялі ўдзел у алімпіядзе, але і пазнаёміліся са сталіцай Украіны, пасябравалі з аднагодкамі з іншых краін.