ГДУ імя Ф. Скарыны адзначыў Міжнародны дзень роднай мовы

Студэнты-філолагі правяралі свае веды па беларускай мове — пісалі татальны дыктант. Да іх далучыліся і выкладчыкі. Арганізатары акцыі імкнуліся пераканаць, што быць пісьменным — важна для кожнага чалавека, што займацца беларускай мовай нялёгка, але захапляльна і карысна. Акцыя аб’яднала ўсіх, хто ўмее і хоча гаварыць па-беларуску.

У гэты дзень на філфаку быў праведзены і конкурс чытальнікаў, удзельнікамі якога сталі студэнты дзённай формы навучання. Яны прадставілі закончаныя фрагменты твораў розных літаратурных жанраў, што адпавядалі тэматыцы конкурсу. Арганізатары імкнуліся да папулярызацыі твораў класічнай і сучаснай айчыннай паэзіі і прозы, выяўлення і падтрымкі таленавітых выканаўцаў. Пераможцы былі ўзнагароджаны граматамі.

У межах акцыі студэнты філалагічнага факультэта правялі флэшмоб «Гавары са мной па-беларуску». «Ці ведаеце вы, які сёння дзень?», «Якую мову лічыце роднай?» — з такімі пытаннямі яны звярталіся да сустрэчных. Прапаноўвалі перакласці словы з рускай мовы на беларускую (мечтатель — летуценнік, вдохновение — натхненне, колыбельная — калыханка, родник — крыніца) і раздавалі памятныя карткі.