Гомельскі нумар “Полымя”

Жнівеньскі нумар літаратурна-мастацкага і грамадска-палітычнага часопіса “Полымя” прысвечаны Гомельшчыне літаратурнай. Прымеркаваны ён да Дня беларускага пісьменства, які праводзіцца сёлета на Хойніччыне. Адкрывае яго артыкул старшыні Гомельскага аблвыканкама Аляксандра Якабсона “Духоўныя далягляды Гомельшчыны”. У ім губернатар распавядае не толькі пра ўзоры высокага пісьменства, створаныя ўраджэнцамі краю Іванам Мележам, Іванам Шамякіным, Іванам Навуменкам, Раманам Сабаленкам, Андрэем Макаёнкам, Барысам Сачанкам, Іванам Сярковым і іншымі пісьменнікамі. Перад чытачом сапраўды нібы прасціраюцца духоўныя далягляды, ён адкрывае для сябе Гомельшчыну музейную, мастацкую, фестывальную, турыстычную… “Клапаціцца пра захоўванне гісторыка-культурнай спадчыны краю — гэта значыць клапаціцца пра духоўнае здароўе кожнага, хто жыве на яго зямлі”, — падкрэслівае Аляксандр Серафімавіч.
У нумары змешчаны “Грузінская аповесць” Івана Шамякіна, апавяданні Міхася Даніленкі, Валянціны Кадзетавай, вершы Ніны Шкляравай, Алены Мацвіенкі, Алеся Дуброўскага, Міхася Болсуна, Святаслава Крупенькі, Міколы Ждановіча, Ізяслава Катлярова, Міколы Старчанкі і творы іншых пісьменнікаў.