І шыць, і жыць — творча!

У кожнай прафесіі можна праявіць талент, варта толькі ніколі не спыняцца ў сваім развіцці, удасканальваць майстэрства. У гэтым упэўніліся будучыя швачкі, навучэнкі гомельскага вучылішча № 230 лёгкай прамысловасці на нядаўняй сустрэчы з празаікам Евай Дударгай, членам грамадскага аб’яднання “Саюз пісьменнікаў Беларусі” і паэтэсай Інай Спасібінай, якая займаецца ў школе-студыі “Малады літаратар”.
Дарэчы, Ева Антонаўна не ўпершыню ў гэтай навучальнай установе: у мінулым годзе прэзентавала свой фотаальбом, які занатаваў найбольш каларытныя мясціны яе роднай вёскі Раманавічы Гомельскага раёна. Гэтае выданне і іншыя кнігі з творамі аўтаркі-зямлячкі аформлены ў бібліятэцы навучальнай установы ў выставу.
Госці падзяліліся сваімі творчымі планамі, расказалі пра асабістае жыццё. Іна Спасібіна — шматдзетная маці, і пры гэтым — сталая паэтэса, уразіла юных слухачак сваімі адухоўленымі вершамі, скіраванымі да чалавечай душы, да пошуку адказаў на вечныя пытанні. Было шмат апладысментаў і слоў шчырай падзякі творцам за гэтую сустрэчу, якая зрабіла звычайны восеньскі дзень яркім і запамінальным.