Выстава «Белая Русь і яе суседзі» (фота)

У Нацыянальным гістарычным музеі Рэспублікі Беларусь праходзіць унікальная выстава «Белая Русь і яе суседзі». Выстава з’яўляецца сумесным праектам Расійскага этнаграфічнага музея (Санкт-Пецярбург) і Нацыянальнага гістарычнага музея Рэспублікі Беларусь. Выставачны праект «Белая Русь і яе суседзі» прэзентуецца ўпершыню і падрыхтаваны спецыяльна для экспанавання ў Мінску. Экспазіцыя прадстаўляе больш за 700 аўтэнтычных помнікаў традыцыйнай культуры народаў, якія засялялі землі гістарычнай вобласці, якая атрымала назву «Белая Русь». Гэта беларусы, літоўцы, латышы, палякі, украінцы і іншыя — усе тыя этнасы, што некалі пражывалі ў межах адзінай дзяржавы — Вялікага Княства Літоўскага. Увазе гледача прадстаўлены традыцыйны касцюм, які найбольш яскрава стварае візуальны вобраз народаў гэтага рэгіёна, падкрэслівае агульныя рысы і паказвае своеасаблівасць кожнай з культур. Адной з цэнтральных тэм выступае вясельны комплекс — своеасаблівы этнічны сімвал народаў. Другі комплекс прысвечаны тэме рэлігіі, канфесіям, ролі як важнай частцы нацыянальнага адзінства і культурнай разнастайнасці народаў. На выставе таксама экспануюцца матэрыялы, якія распавядаюць пра рамесныя традыцыі: ткацтва, дрэваапрацоўку, ганчарства, кузнечную справу. Асобнае месца адведзена калекцыі ўнікальных музычных інструментаў, якая ўпершыню экспануецца ў такім аб’ёме. Экспазіцыя выставы не толькі знаёміць з найцікавейшым матэрыялам, але і з’яўляецца прэзентацыяй аднаго з буйнейшых этнаграфічных музеяў Еўропы. Расійскі этнаграфічны музей ведзе сваю гісторыі з 1895 г., ён знаёміць з спрадвечнай культурай розных народаў Расіі і сумежных з ёю краін, іх побытам, традыцыямі, светапоглядам, дазваляе пераканацца ў іх адначасовым падабенстве і самабытнасці. Інфармацыя з сайта Нацыянальнага гістарычнага музея Рэспублікі Беларусь