Прэзентацыя фільмаў “Дачка Прыпяці” і “Кола часу” адбудзецца 12 студзеня ў Тураве (відэа)

Прэзентацыя фільмаў “Дачка Прыпяці” і “Кола часу” адбудзецца 12 студзеня ў Тураўскім гарадскім Доме культуры. Першая з хранікальна-дакументальных кінастужак вытворчасці РУП “Беларускі відэацэнтр” (рэжысёр Ігар Бышнёў, аўтары сцэнарыя Рэгіна Гамзовіч, Ігар Бышнёў, Юры Ігруша) прысвечана зборнаму вобразу жанчыны, якая нарадзілася і жыве ва Ўсходнім Палессі на беразе Прыпяці. Яе лёс цалкам звязаны з гэтай ракой — праз прыроднае асяроддзе, штодзённую працу, памяць пра памерлых і клопат пра жывых, традыцыйную культуру і праваслаўную веру. Большасць гераінь фільма жыве ў вёсцы Пагост, што знаходзіцца ў шасці кіламетрах ад Турава і размешчана, як у клінку, паміж дзвюх рэк у месцы, дзе Сцвіга ўпадае ў Прыпяць і відаць яшчэ сляды пратокі Тур, якая дала назву гораду Тураву. Фільм “Кола часу” знаёміць гледача з традыцыйнай культурай вёскі Пагост і фальклорна-этнаграфічным гуртом “Міжрэчча”, які на працягу гадавога кола народнага календара захоўвае абрады на Ражаство і Шчадрэц, гуканне вясны ў апошні дзень Масленіцы і на Саракасвятых 22 сакавіка, звычаі памінання продкаў, свята Юр’я, памятае старажытны абрад “Жаніцьба Коміна” на свята Галавасека 11 верасня. Праект “Беларускага відэацэнтра” — своеасаблівая даніна павагі творчаму жаночаму калектыву, які існуе дзеля таго, каб палеская вёска не страціла сваёй этнічнай самабытнасці. У рамках прэзентацыі плануецца выступленне гурта “Міжрэчча”. [youtube]ga6H3ie9SLY[/youtube] [youtube]LBsbFOgGWMQ[/youtube]