Аз і букі паэтычнай навукі

Сёння пачынаючых паэтаў і празаікаў можна хутчэй знайсці ў Інтэрнэце ці пабачыць на свае вочы, чым знайсці ў краме іх кнігі. Таму калі ў маладога творцы выходзіць кніга — гэта сапраўды свята. Паэтычныя зборнікі “Пять тысяч километров по любви” Таццяны Нілавай і “Пад ветразем ранку” Анастасіі Кацюргіной пабачылі свет у серыі “Аз”, заснаванай у 2010 годзе выдатным паэтам, членам Саюза пісьменнікаў Беларусі Іванам Бісевым. Такая пуцёўка ў літаратуру дала магчымасць амаль дзясятку маладых аўтараў Гомельшчыны, навучэнцам літаратурнай школы-студыі Ніны Шкляравай заявіць пра сябе. Таццяна і Анастасія прымеркавалі прэзентацыю сваіх зборнікаў да Міжнароднага свята паэтаў. Кнігі “Пять тысяч километров по любви” і “Пад ветразем ранку” адрозніваюцца мовай, паэтычнай рэфлексіяй і пошукам формы. Але кожны верш прысвечаны вечнай тэме — жаночаму каханню. І модны постмадэрн, і класічны паэтычны радок гучалі ў выкананні маладых аўтараў на творчай вечарыне ў Славянскай бібліятэцы даволі моцна. У зале гучалі вершы і аўтарскія песні, дэманстраваліся паэтычныя кліпы, а таксама ладзіўся арт-перформанс — усім жадаючым прапанавалася намаляваць пэндзлем і фарбамі пры­ход вясны і кахання на тварах. У выніку вясна і каханне стварылі непаўторную паэтычную атмасферу, у якой і нараджаецца сапраўднае свята прыгожага слова. За акном — час запатрабаванай літаратуры, але аўтары працягваюць пісаць кнігі для душы і шукаць, калі не чытача, то ўласнае “я”. Адкрытым застаецца толькі адно пытанне: як зрабіць такую літаратуру якаснай і запатрабаванай, тым больш што адно не заўсёды абумоўлівае другое.