Абласны цэнтр турызму і краязнаўства правёў конкурс «Невядомая Гомельшчына»

Шмат напісана пра гісторыка-культурную спадчыну Гомельшчыны, аднак ёсць і не выяўленыя, малавядомыя падзеі і факты рэгіянальнай гісторыі і культуры, якiя цiкавяць не толькi спецыялiстаў, але i шырокае кола людзей. Абласны цэнтр турызму і краязнаўства навучэнскай моладзі правёў конкурс відэафільмаў і фотаздымкаў «Невядомая Гомельшчына». Навучэнцы ўстаноў адукацыі вобласці даслалі 40 відэафільмаў і 333 фотаздымкі невядомых або забытых помнікаў гісторыі, культуры і прыроды, абрадаў, традыцый і людзей. Работы прадстаўлены ў васьмі намінацыях. Кожны фільм і фотаздымак меў сваю цікавую гісторыю, у некаторых з іх уздымаліся праблемы, напрыклад, захавання гісторыка-культурнай спадчыны, рэстаўрацыі былых панскіх сядзіб і замкаў, адраджэння мясцовых абрадаў. У фотаконкурсе вызначылі 22 лепшыя работы, у конкурсе відэафільмаў — 6. Найбольш уразілі членаў журы святыя мясціны вёскі Чалюшчавічы Петрыкаўскага раёна; пакінутая вёска Труд Кармянскага раёна; вуліца ў вёсцы Чаплін Лоеўскага раёна; захаваны абрад «Свяча» ў Калінкавіцкім раёне; дрэва кахання ў Нароўлі; бусліная сасна; мірнае неба з вясёлкай над помнікам Рымы Шаршнёвай у вёсцы Ламавічы Акцябрскага раёна; былы вязень фашысцкіх канцлагераў трэнер па валейболу з горада Жлобіна Г. Пархоменка, які сваімі рукамі збудаваў і аздобіў арнаментам цудоўны дом, напісаў тры кнігі, гімн горада і шмат песень; закінутая сядзіба Ваньковічаў у Рудакове Хойніцкага раёна з паркам і сажалкамі плошчай каля пяці гектараў і палац Прозараў у вёсцы Астрагляды Брагінскага раёна.