У Мазыры праходзіць выстава з нагоды 50-годдзя творчай дзейнасці Пятра Захарава

Вобразы роднага краю Выдатны мастак, выдатны юбілей, выдатная выстава! Гэта ўсё пра яго — Пятра Захарава. Праходзіць выстава з нагоды 50-годдзя творчай дзейнасці майстра. Талент у члена саюза мастакоў яшчэ былога СССР сапраўды вялікі і шматгранны, і не толькі ў жывапісе. Другое творчае жыццё яго звязана з Мазырскім драматычным тэатрам імя І. П. Мележа. Да тэатральных пастановак Захараў стварыў больш за 70 дэкарацый. Двойчы ўдастоены залатых медалёў на ўсесаюзных фестывалях народных тэатраў. Спектакль «Раскіданае гняздо» ішоў нават на крамлёўскай сцэне. У гарадской выставачнай зале Мазыра даўно не было так мнагалюдна. Павіншаваць мастака прыйшлі шматлікія паклоннікі — аматары жывапісу, калегі па творчаму цэху. Дарэчы, амаль усе яны лічаць сябе вучнямі Пятра Сяргеевіча. Старэйшы і адзін з самых заслужаных майстроў заўсёды шчодра дзяліўся талентам з моладдзю і не без яго ўдзелу ў горадзе над Прыпяццю існуе цэлая плеяда выдатных мастакоў. Таму і словы ўдзячнасці ад іх шчырыя, ад душы. Найлепш выразіў іх мазырскі паэт Васіль Андрыеўскі:

А сонца да зямлі ўсё бліжэй хіліцца. Душа на божы свет глядзіць і дзівіцца. Бяроз палесскіх восеньскае зарава — Нібы на палатне Пятра Захарава!

Сама ж юбілейная выстава — гэта дзесяткі лепшых палотнаў розных гадоў і новых, на якіх пераважаюць краявіды роднай Мазыршчыны. Яна для Пятра Сяргеевіча на працягу дзесяцігоддзяў была і застаецца невычэрпнай крыніцай натхнення. Кідаецца ў вочы мноства асенніх пейзажаў. І гэта асацыіруецца з восенню жыцця аўтара. Але не з сумнай і змрочнай, а накшталт болдзінскай у Пушкіна. Яркія, сакавітыя фарбы, выразныя, светлыя вобразы, буйства прыроды і жыцця наогул. Адчуваецца, што майстэрства і талент мастака з цягам часу, як віно, становяцца толькі лепшымі. А сам ён здольны яшчэ доўга радаваць землякоў сваёй творчасцю.