Новы альбом Re1ikt «Рэкі прабілі лёд» толькі-толькі з’явіўся ў плэерах слухачоў.

Музыка прабіла лёд

Аб музычным вопыце і наватарстве гутарым з барабаншчыкам гурта Аляксандрам Дземідзенкам. — Re1ikt даволі актыўна канцэртуе. Раскажы пра апошнія выступы. — У Гомеле быў акустычны канцэрт у межах праекта «Будзьма беларусамі!». Мы прэзентавалі АМВ-відэа на песню «Брудная дзяўчына», якую зрабілі маскоўскія хлопцы з S-studio. Таксама прэзентавалі свой новы альбом 30 кастрычніка ў Мінску ў клубе Re:public, а трошкі раней у Польшчы. — Гэта беларускамоўная работа? — Так, гэта цалкам беларускамоўны альбом. Мы будзем першыя, хто іграе такiя песні на беларускай мове. — Вам больш прыемна даваць акустычныя ці «цяжкія» канцэрты? — Нам падабаюцца любыя канцэрты. Мы трымаем баланс паміж цяжкім гукам, драйвам і акустычнай прыгажосцю. Гэта дае магчымасць пранікацца рознымі настроямі, лепш кантактаваць з публікай. Калі мы робім акустычныя версіі, песні атрымліваюць новае жыццё, гучаць па-іншаму. Гэта вельмі цікава, асабліва калі ты іграеш доўга адно і тое ж. — Чым, акрамя музыкі, займаюцца ўдзельнікі гурта? — Не ведаю пра астатніх, але я займаюся дызайнам і відэа. Амаль усе вокладкі Re1ikt ды Re123+ зроблены мной. Калі трэба, звяртаюся за дапамогай да сваіх сяброў — мастакоў і дызайнераў. Напрыклад, ілюстрацыі да новага альбома «Рэкі прабілі лёд» малявала Кацярына Філіст, беларуская мастачка, якая зараз жыве ў Берліне. — Дарэчы, чым жыве ваш сайд-праект Re123+ зараз? Цяжка паспяваць пісаць музыку ў двух накірунках? — Re123+ зараз знаходзіцца ў рэжыме чакання. Гэта больш гукавое мастацтва (шорах скамечанай паперы, гудзенне мабільнага тэлефона, незвычайнае гучанне гітары), чым музычнае. Ёсць канцэпцыя для новага запісу, але пакуль мы заняты Re1ikt і яго новым альбомам.