Кніга Віктара Раманцова «Зведаная зямля. Светлагоршчына ў пытаннях і адказах» убачыла свет

Кожнаму жыхару Светлагоршчыны

З гэтай нагоды ў Гомельскай спецыялізаванай славянскай бібліятэцы (а раней у Светлагорскім гісторыка-краязнаўчым музеі) адбылася сустрэча з аўтарам. Віктар Раманцоў — журналіст, літаратар, краязнаўца — шмат год даследаваў культуру і гісторыю роднай зямлі. Апошні час грунтоўна працаваў над сваёй першай кнігай, якую прысвяціў 450-годдзю Светлагорска (да 1961 года — Шацілкі) і 50-годдзю атрымання статусу горада. «Я спазнаў свой кавалак зямлі, а колькі яшчэ нязведанага засталося?» — гаворыць аўтар ва ўступе. Ён плануе зрабіць «Зведаную зямлю» трылогіяй. У першай кнізе ёсць адказы на пытанні, колькі гадоў Светлагорску, дзе ў раёне знайшлі першую нафту, адкуль на Светлагоршчыне старажытныя каменныя крыжы, змешчаны нарысы пра славутых людзей, што нарадзіліся на светлагорскай зямлі. Асвятляюцца і пытанні сучаснасці: чаму жыхарам раёна блізкая трагедыя на Нямізе, ці ўстанаўлівалі светлагорцы сусветныя спартыўныя рэкорды і ці ўдзельнічалі ў «Еўрабачанні»? Краязнаўца здолеў сканцэнтраваць у сваёй кнізе працы шматлікіх даследчыкаў і гісторыкаў, што пісалі пра Светлагоршчыну, паразважаць, якое месца адведзена гэтаму рэгіёну ў свеце. Большасць артыкулаў ілюстравана фотаздымкамі. На сустрэчы аўтар падзяліўся планамі на другую кнігу «Зведанай зямлі»: расказаць, як чарнобыльская катастрофа закранула Светлагоршчыну, пра воінаў-афганцаў — ураджэнцаў раёна, пра трагедыю ўсёй Беларусі і асабліва гэтага краю — СНІД. «Той, хто ведае мінулае і сучаснае свайго краю — ведае яго будучыню», — сцвярджае Віктар Раманцоў сваёй кнігай, і з гэтым цяжка не пагадзіцца.