Дні культуры Украіны правяла Гомельская спецыялізаваная Славянская бібліятэка

“Зоряна моя, калінова”

Дні культуры Украіны, прысвечаныя 20-годдзю незалежнасці краіны, правяла Гомельская спецыялізаваная Славянская бібліятэка сумесна з грамадскім аб’яднаннем украінцаў “Верхавіна”. Чытальная зала на адзін дзень ператварылася ў кіназалу: тут быў арганізаваны паказ фільма “Украіна — станаўленне нацыі” польскага рэжысёра Ежы Гофмана, а таксама мультфільма для дзяцей “Ліс Мікіта” (па паэме-казцы Івана Франко). А завяршыліся дні сардэчнай сустрэчай украінцаў-гамяльчан, якія прыйшлі адзначыць свята незалежнасці, азнаёміцца з выставай кніг і часопісаў “Україна: вчора та сьогодні”. Кандыдат гістарычных навук, дацэнт ГДУ імя Ф. Скарыны Анатоль Рубан зрабіў экскурс у гісторыю станаўлення, расказаў, якія праблемы перажывае маладая дзяржава. Шчыра вітаў землякоў намеснік старшыні “Верхавіны” Багдан Дземкіў. Дырэктар бібліятэкі Александрына Зубец агучыла віншавальныя тэлеграмы, якія прыбылі з пасольстваў на адрас “Славянкі”. А выступленне народнага ансамбля бандурыстаў “Вярбічанька” з Веткі, лаўрэатаў пяці ўсебеларускіх фестываляў народнай культуры ў Гродна і сёмага фестывалю творчасці ўкраінцаў у межах XV міжнароднага фестывалю “Славянскі базар у Віцебску”, стала сапраўдным падарункам. Чароўная музыка і спевы гэтага самабытнага калектыву прымусілі далучыцца ўсіх прысутных, так што і падпявалі, і прытанцоўвалі.