Выпрабаванне на чалавечнасць

Заўтра — 90 гадоў з дня нараджэння народнага пісьменніка Беларусі, нашага земляка Івана Шамякіна. Яго творы чытаеш і перачытваеш, звяртаешся да герояў у самыя складаныя моманты свайго жыцця. I не заўважаеш, як магія шамякінскага сюжэта заводзіць цябе ў лабірынты чалавечых стасункаў і сувязей, і ўжо не адарвацца ад старонак яго аповесцей і раманаў. Філіграннасць слова, шчырая размова з чытачом, выразнасць думак. Адчуваеш, што персанажаў, выпісаных Майстрам, ты таксама сустракаў на гарадскіх вуліцах, у бібліятэцы, на навуковай канферэнцыі… Такі вось талент пісьменніка! Усе героі Івана Шамякіна праходзяць галоўнае ва ўсе вякі выпрабаванне — на чалавечнасць. Напрыканцы жыцця пісьменніка асабліва хвалявала, як сучасныя суайчыннікі перажывуць іспыт раскошай вітрын, бездухоўнасцю тэлепраграм, Сусветнай павуцінай, што ўсё актыўней адлучае ад кнігі юнае пакаленне. Гаворым пра гэта з родным пляменнікам класіка, 37-гадовым Аляксандрам Смірновым (на здымку). Ён сын сястры Івана Пятровіча Таццяны. Працуе ў Гомелі саветнікам прадстаўніцтва Дэпартамента па гуманітарнай дапамозе. Цікаўлюся, які ў яго любімы дзя­дзькаў твор. Аказваецца, раман “Крыніцы”. — Апошняя наша сустрэча з Іванам Пятровічам адбылася ў рэанімацыі. Ён сыходзіў з жыцця як сапраўдны франтавік. Сказаў нам на развітанне: “Трымайцеся, хлопцы!” — падзяліўся нешматслоўны Аляксандр Іванавіч. Да 90-годдзя з дня нараджэння Івана Пятровіча Шамякіна ў Палацы Румянцавых і Паскевічаў адкрыта выстава кніг пісьменніка-земляка “Мае кнігі — мая біяграфія”. А 31 студзеня ў 15.00 у абласной універсальнай бібліятэцы імя Леніна пройдзе вечарына, прысвечаная юбілейнай даце.