Лепш адзін раз пачуць

Калі вы сапраўдны аматар выдатнай інструментальнай музыкі, то, спадзяюся, не пакінулі без увагі такую падзею, як прыезд Ула­дзіміра Угольніка, музыканта сусветнага ўзроўню, і Алега Капянкова, старшыні клуба гітарыстаў Беларусі, у наш горад. У гарадскім цэнтры культуры адбылася цёплая сустрэча публікі з таленавітымі музыкантамі, багатая на добрыя эмоцыі і прыемныя нечаканасці. А. Капянкоў выступіў і ў якасці празаіка, а У. Угольнік паказаў, што ён сапраўдны майстар сваёй справы. На жаль, мінскія госці вельмі спяшаліся дадому, таму мне давялося паразмаўляць з імі толькі некалькі хвілін.
— Клубу гітарыстаў Беларусі ўжо 26 год, — паведаміў А. Капянкоў. — За гэты час мы паспелі пабываць у многіх краінах свету, што дазволіла, як кажуць, і на людзей паглядзець, і сябе паказаць. Такія сустрэчы вельмі дапамагаюць развівацца, і як сведчанне таму — імёны, якімі мы ганарымся. Гэта і Ян Скыган, і Наталля Лепніцкая, і Юлія Лонская, і многія іншыя. Спадзяюся, што лёс рыхтуе для нас шмат новых адкрыццяў.
— Вельмі прыемна прыязджаць у ваш горад. Выдатны слухач і добрая атмасфера, — падзяліўся У. Угольнік.
— Раскажыце, чаму менавіта гітара стала вашым інструментам? Думаю, калі б вы абралі спевы, дасягнулі б не меншых вышынь.
— Спеваком не стаў таму, што не разглядаю свой вакал як нешта сур’ёзнае. Захапленне гітарай стала вынікам уплыву такіх гуртоў, як Beatles, Rolling Stones... Зараз працую выкладчыкам у Беларускім дзяржаўным універсітэце культуры на кафедры мастацтва эстрады, перадаю свой вопыт.
Нам жа з вамі застаецца зайздросціць яго студэнтам і чакаць новых сустрэч з сапраўднымі талентамі.
Алена Чуянкова