Гомель каталіцкі: погляд праз гады

У касцёле Нараджэння Божай Маці ў Гомелі прайшла прэзентацыя кнігі “Костел и власть на Гомельщине (20 — 30-е годы XX в.)”. У гэтай кнігі некалькі аўтараў. Андрэй Лебедзеў — выпускнік гістарычнага факультэта ГДУ імя Ф. Скарыны, аспірант БДУ, асістэнт кафедры гісторыі Беларусі ГДУ імя Ф. Скарыны. Віктар Пічукоў — кандыдат гістарычных навук, выкладчык кафедры гісторыі Беларусі ГДУ імя Ф. Скарыны. Ксёндз Славамір Ляскоўскі — настаяцель каталіцкага прыходу ў Гомелі на працягу апошніх 20 гадоў.
Кніга напісана на рускай мове і выдадзена ў Варшаве. Выданне змяшчае ўнікальныя матэрыялы, якія знойдзены ў архівах Беларусі і датычацца непасрэдна тэрыторыі Гомельскай вобласці. Ёсць шмат цікавых ілюстрацый, сярод іх даваенныя здымкі касцёла, які знахо-дзіўся на галоўнай плошчы Гомеля, ксяндзоў, якія тут служылі.
Несумненна, гэта кніга — адно з першых грунтоўных выданняў на тэрыторыі ўсёй Усходняй Беларусі. Яна будзе цікава і карысна ўсім, хто прагне праўды і веры на зямлі Хрыстовай. Амаль усе экземпляры ўжо разышліся па бібліятэках Беларусі і Польшчы.
Вадзім ЛОСЬ,
студэнт гістарычнага факультэта
Гомельскага дзяржаўнага універсітэта
імя Ф. Скарыны