МЯСЦІНЫ яго непаўторнай вясны

89 гадоў таму назад на гомельскай зямлі нарадзіўся Іван Пятровіч Шамякін. І ўсе мы, землякі і чытачы яго твораў, з нязменнай цеплынёй і павагай згадваем народнага пісьменніка Беларусі, лаўрэата Дзяржаўных прэмій, акадэміка, актыўнага грамадскага дзеяча. Яго мудрыя, жыццёвыя кнігі дапамагаюць у самыя складаныя хвіліны жыцця, з’яўляюцца духоўнымі арыенцірамі.
Цудоўны падарунак да чарговага дня нараджэння пісьменніка падрыхтавалі навучэнцы гомельскай гімназіі № 10 пад кіраўніцтвам настаўніка беларускай мовы і літаратуры Сяргея Уладзіміравіча Несцяровіча. У сваім літаратурна-крытычным нарысе паводле аўтабіяграфічных твораў “Слаўся, Марыя!”, Непаўторная вясна”, рамана “Сэрца на далоні”, дзённікаў і мемуараў яны даследуюць шамякінскія мясціны ў нашым абласным цэнтры.
Прынамсі, рабятам удалося ўстанавіць, што тэхнікум будаўнічых матэрыялаў, у якім з 1936 па 1940 год вучыўся Іван Шамякін, падпарадкоўваўся наркому мясцовай прамысловасці і знаходзіўся на вуліцы Ветранай, 46. У час вайны гэты будынак быў зруйнаваны. Гімназісты зрабілі здымкі, зафіксавалі месца размяшчэння тагачаснага тэхнікума. Зараз гэта вуліца імя Гагарына.
Сустрэліся рабяты ў Гомелі і са стрыечнай сястрой Марыі Кротавай (жонкі пісьменніка). Ганна Міхайлаўна Кулікова (Яндоўская), 1920 года нараджэння, згадала ім пра сваю сястру, сустрэчы з сям’ёй Шамякіных.
Творчая работа гімназістаў адзначана дыпломам другой ступені на “Мележаўскіх чытаннях”, якія праходзілі напрыканцы мінулага года. Высока адзначана творчасць юных гамяльчан і навукоўцамі ГДУ імя Ф. Скарыны.
Тамара КРУЧЭНКА