“Захаваем мір разам!”

Абласны дзіцячы конкурс чытальнікаў “Захаваем мір разам!” праведзены абласным аддзяленнем грамадскага аб’яднання “Саюз пісьменнікаў Беларусі” пры падтрымцы ўпраўлення адукацыі аблвыканкама, абласнога аддзялення Беларускага фонду міру і абласной арганізацыі Беларускага грамадскага аб’яднання ветэранаў.
Больш за дзевяцьсот школьнікаў прымалі ўдзел у раённых этапах конкурсу ў намінацыях “Паэзія” і “Проза”. Заключны этап прайшоў на базе гомельскай сярэдняй агульнаадукацыйнай школы № 61.
Гучалі ўрыўкі з твораў Івана Мележа, Івана Шамякіна, Барыса Сачанкі, Івана Навуменкі, Міколы Мятліцкага, Анатоля Зэкава, Уладзіміра Гаўрыловіча, Алега Ананнева, Ніны Шкляравай... Журы выбірала самых таленавітых, артыстычных дзяцей, здольных раскрыць мастацкую задуму пісьменніка.
У намінацыі “Паэзія” першае, другое і трэцяе месца занялі адпаведна Іван Давыдзенка з Рэчыцкага раённага ліцэя (на здымку), Максім Кучвальскі, вучань САШ № 61 г. Гомеля, Аліна Анікіна, гімназістка з г. Калінкавічы.
У намінацыі “Проза” лепшымі прызнаны вучаніца Прыснянскай САШ Веткаўскага раёна Марыя Гардзіенка, Таццяна Чырэц з Чырвоненскай САШ Жыткавіцкага раёна, Вольга Новікава, вучаніца Лельчыцкай САШ № 2.
Пераможцы адзначаны спецыяльнымі дыпломамі заснавальнікаў конкурсу, а таксама бібліятэчкай кніг.

У. ПРЫАЗЁРНЫ