Грай, гармонік!

У мінулыя выхадныя ў Ельску было асабліва горача. І вінавата ў гэтым не толькі надвор’е, але і традыцыйны, шосты па ліку, фестываль гарманістаў “Грай, гармонік”. Больш за 200 музыкаў прыехалі ў Ельск з Беларусі, Украіны і Польшчы, каб паказаць сваё майстэрства і павучыцца ў таварышаў па цэху.
Акрамя конкурсу ў гарадскім скверы былі арганізаваны “ельскія падвор’і”, дзе самі ўдзельнікі фестывалю прапаноўвалі смачныя стравы. Тут ужо рабілася асабліва горача ад ельскай гасціннасці. На алеі мастакоў і майстроў можна было набыць вырабы народных умельцаў і рамеснікаў, паглядзець, як гэта робіцца. Куды ні глянь — усюды радасць і палескі каларыт, які не перадаць словамі, а толькі гукамі гармоніка.
Але конкурс ёсць конкурс, і ў ім павінны быць пераможцы. У намінацыі “Саліст-гарманіст” першае месца заваяваў Валерый Канопліч з Ельска, сярод ансамбляў гарманістаў перамог калектыў Зашырскага культурна-спартыўнага цэнтра (Ельскі раён), сярод выканаўцаў прыпевак перамагла Наталля Прус з Мазырскага раёна. Гран-пры — у Марыны Шчарбаковай, дырэктара Млынокскага культурна-спартыўнага цэнтра (зноў Ельскі раён). Яна зачаравала журы не толькі цудоўным выкананнем прыпевак, але і акцёрскім майстэрствам.
Дзякуючы намаганням усіх жыхароў Ельска атрымалася сапраўднае свята народнай творчасці, а што асабліва прыемна, удзельнічала ў ім і моладзь.
Фестывалю быць!