Народна-абрадавае свята “Шырокая Масленка” прайшло каля Лядовага палаца ў Гомелі

Гасцей і жыхароў горада парадавала выступленне народнага калектыву Беларусі цыганскага тэатра Gipsy Band. Для жадаючых правесці зіму весела і з добрым настроем былі арганізаваны музычна-тэатралізаваная праграма, выступленні калектываў мастацкай самадзейнасці, вясёлыя рухомыя гульні, заліхвацкія конкурсы, віктарыны, аўкцыёны бліноў. Удзельнікаў свята імкнуліся здзівіць майстры народных рамёстваў. На выставе былі прадстаўлены вырабы з саломкі, паперы, бісеру, лазы, дэкаратыўнай тканіны, скуры, атласных стужак, дроту. Тут жа красаваліся работы, выкананыя ў тэхніках пэчворк, квілінг, разьбы па дрэве і іншых.   На гульнявых пляцоўках для рабят арганізавалі конкурсы і віктарыны. Жадаючыя маглі зрабіць на памяць фотаздымкі з казачнымі персанажамі, апранутымі ў дзіўныя рознакаляровыя касцюмы. Самыя смелыя ўдзельнікі святочнай праграмы каталіся на поні і хадзілі на высачэзных хадулях. Не абышлося свята провадаў зімы без смачных духмяных бліноў і гарачай гарбаты – галоўнага кулінарнага атрыбуту Масленкі. Прысутныя частаваліся шашлыкамі, салодкімі прысмакамі і фруктовымі кактэйлямі. Ласунам прапанавалі марозіва на любы густ. Напрыканцы тэатралізаванай праграмы, як і водзіцца, пудзіла зімы спалілі. Нягледзячы на тое, што ў гэты дзень надвор’е было хмарным і сонейка не выглянула, ва ўдзельнікаў свята настрой быў цудоўным. Адчуванне надыходу вясны надавала прысутным бадзёрасці і радасці ў душы.