Зажынкі 2013 ў Жлобінскім раёне (фота, відэа)

Ад хлебнай ніўкі да “Дажынак”!

У КСУП “Свярдлоўскі” Жлобінскага раёна распачалі жніво За вёскай Кірава каля залацістага поля трыцікале выстраіліся радком камбайны, машыны і хлебаробскія экіпажы, каб распачаць збор зерня новага ўраджаю. Жлобіншчына рыхтуе каравай да рэспубліканскага фестывалю-кірмашу «Дажынкі». «Мы вітаем вас, людзі добрыя, людзі добрыя, працавітыя», — пад спеў народнага ансамбля «Сузор’е» Кароткавіцкага СДК маладзенькія жнейкі зажынаюць першы сноп і ўручаюць яго старшыні Жлобінскага райвыканкама Генадзю Суздалеву. А ён пад воклічы «крыта-крыта, поўна жыта» тройчы падкідвае букет з калоссяў. — У апошнія тры гады наш край дае 10 працэнтаў караваю вобласці, — падкрэсліў кіраўнік раёна. — Шчыра жадаю ўсім нам цудоўнага ўраджаю і сёлета! Павіншаваў хлебаробаў старшыня райкама прафсаюза работнікаў АПК Пётр Пушкоў, а пратаіерэй Павел Бандарчук, настаяцель храма Пакрова Прасвятой Багародзіцы, асвяціў поле. У добры час! Па стану на раніцу 19 ліпеня гаспадаркі Гомельшчыны ўбралі зерневыя і зернебабовыя на плошчы 66189 гектараў, што складае 19% ад плана. Гэта ўдвая больш, чым у мінулым годзе на гэтую дату.